ULMAk, Oñatiko Udalak eta Bidebarri laneratze enpresak hitzarmena sinatu dute “Laneratuz” programa garatzeko — Begira - Ulma aktualitatea
Ulma Taldea

ULMAk, Oñatiko Udalak eta Bidebarri laneratze enpresak hitzarmena sinatu dute “Laneratuz” programa garatzeko

Hiru erakundeok bat datoz esatean Oñatin gizarteratzeko eta laneratzeko zailtasunak dituzten pertsonei laguntzea garrantzitsua dela enplegua eta aberastasuna modu egokiagoan banatzeko.
ULMAk, Oñatiko Udalak eta Bidebarri laneratze enpresak hitzarmena sinatu dute “Laneratuz” programa garatzeko
2018/07/27

ULMA Taldeak, bere Fundazioaren bidez, agintzen du ahal duen neurrian Bidebarri Enplegu Zentroa S.L enpresan laneratze prozesua amaitzen duten pertsonak aldi baterako kontratatuko dituela. Bestalde, Oñatiko Udalak herriko garapen sozio-ekonomikoa indartu eta enplegua sortzeko helburua duela, gizarteratze eta laneratze prozesuetatik datozen pertsonak kontratatzeko diru-laguntza programa sortuko du. Azkenik, Bidebarri laneratze enpresaren helburua gizartetik baztertuta geratzeko arriskuan dauden pertsonen egoera sozio-pertsonala hobetzea izanik, pertsona bakoitzaren laneratze ibilbide pertsonalizatua egingo du, laneratze enpresan sartzen den momentutik hasita lan merkatuan txertatzea lortu eta hurrengo hilabeteetan zehar.

Oñatiko alkateorde Ana Martinek, Bidebarri Enplegu Zentroko Jon Igartuak eta ULMA Fundazioko zuzendari Raul Garciak hitzarmena sinatu dute Oñatin, Oñatin gizarteratzeko eta laneratzeko zailtasunak dituzten pertsonen laneratzea sustatzeko konpromisoa hartzeko. Hitzarmenaren bidez gauzatuko den lankidetza programa hau 2018ko uztailaren 1etik 2019ko ekainaren 30era bitartean gauzatuko da.