• Ulma Taldea

Gomiztegi artzain eskolan, euskara praktikatzen

2015/07/07
ULMAn euskara ikasten diharduten hainbat langilek eta bere berbalagunek Gomiztegiko artzain eskola bisitatu zuten joan den ostiralean, uztailaren 3an.

Iazko azaroan espeleoabentura saioa egin zuten Arrikrutz koban, eta aurten, berriz, Arantzazun bazkaldu eta oinezko ibilaldia egin zuten Gomiztegira. Bertan, artzainaren erakustaldia ikusi zuten eta  Gomiztegiko arduradun batek artzaintzaren inguruko azalpenak eman zizkien: artaldea nola gobernatzen den, esnearen produkzioa, gazta egiteko prozesua… 

Parte-hartzaileek esan dutenez, ikusgarria izan zen ardiei ilea mozten bertatik bertara ikustea, eta baita ardi bakoitzaren kontrola zelako zorroztasunez eramaten duten ikustea ere. Horrez gain, 4 gazta ezberdin dastatzeko aukera ere eduki zuten, Upaingo txakolinaz lagunduta. Konbinazio bikaina.

Ekintza honen helburua izan da euskara lanetik kanpo praktikatzea  eta era berean, euskara ikasten diharduten lankideek eta beraien berbalagunek ULMAn egunez egun euskararekiko  erakusten duten inplikazioa errekonozitzea. Ekintza hau ULMA Taldeko Motibazio Taldeak antolatu du, euskara planaren barruan.