ULMA Taldeak “Mugigune” bultzatu du. Osasun muskuloeskeletikoa zaintzeko programa berri bat da

ULMA Taldeak “Mugigune” lesio muskuloeskeletikoen prebentziorako eta tratamendurako ekimen berria bultzatu du. Programa Zerbitzu Medikoak antzemandako beharrak aztertu ondoren sortu da, eta ongizatea eta lan osasuna sustatzea du helburu, arreta gerrialdean eta sorbaldetan jarriz bereziki.

Teknologia eta tratamendu pertsonalizatua

Zerbitzuak “David Health Solutions” teknologia erabiliko du. Diagnostiko funtzional digitalean eta gailu automatizatuen bidez gidatutako ariketa terapeutikoetan oinarritutako sistema bat da. Finlandiako metodologia horrek mugimendu gidatuak eta karga kontrolatuak konbinatzen ditu, artikulazioen mugikortasuna, indarra eta koordinazioa hobetzeko.

Horretarako, programak bost gailu espezifiko izango ditu: hiru bizkarrezurra lantzeko — gerrialdekoa batez ere — eta beste bi sorbalda tratatzeko eta indartzeko. Gainera, Athlongo langile espezializatuek gainbegiratuko dituzte saioak, banakako jarraipena eta pertsona bakoitzaren beharretara egokitutakoa bermatuta.

Pertsona bakoitzari egokitutako programa

Ibilbidea 18 saiotan egingo da, eta hasierako ebaluazio funtzional batekin ekingo zaio. Diagnostiko horretatik abiatuta, parte hartzaile bakoitzarentzako programa pertsonalizatua diseinatuko da. Prozesua amaitzean, beste balorazio funtzional bat egingo da, bilakaera eta lortutako hobekuntzak neurtzeko.

Saioak ULMA Taldearen Zerbitzu Zentralean izango dira, eta astearte eta ostegunetan egingo dira, goiz eta arratsaldeko ordutegian. Parte hartzaileak ULMA Taldeko Lan Osasuneko Zerbitzuak proposatuko ditu, irizpide medikoak eta Taldeko negozioetan betetako lanpostuen eskakizun fisikoak kontuan hartuz.

Osasunarekiko eta ongizatearekiko konpromisoa

Ekimen honekin, ULMA Taldeak pertsonen osasunarekin, ongizatearekin eta zaintzarekin duen konpromisoa indartzen jarraitzen du, lan ingurune osasungarriagoak sortzen lagunduko duten irtenbide berritzaileen aldeko apustua eginez.