Mamadou Adama: Dhagguelen (Ginea Konakry) hezkuntza bultzatzen duen ULMA Forjako bihotz solidarioa.
Elkarrizketa Mamadou Adamari:
- BEGIRA: Mamadou, kontaiguzu, nola hasi zen Dhagguelen eskola bat eraikitzeko proiektu berezi hau?
Mamadou Adama: Nire herrian lehen hezkuntzako eskola bat behar zen, horren behar handia zegoen, eta hor hasi zen dena. Nire komunitatearen alde zerbait egin nahi nuen, beraz, justu pandemiaren aurretik, Oñatiko lagun eta lankideen laguntzarekin, dirua biltzen hasi ginen lehenengo gelak eraikitzeko.
- BEGIRA: Lehenengo hiru gelak eraikitzea lortu duzue. Nolakoa izan da prozesu hori?
Mamadou Adama: Erronka izan da, baina Oñatiko jendea oso solidarioa izan da, hortaz edozein ekarpen ongi etorria da; diruarekin, ideiekin edo zabalkundea eginez egin daiteke ekarpena. Bere ekarpenei eta komunitateak Ginean egindako lanari esker, lehenengo hiru gelak guztiz eginda daude. Abuztu honetan Dhagguelera joan nintzen lanen aurrerapena ikusteko, eta oso zirraragarria izan zen.
- BEGIRA: Zer esan nahi du eskola honek Dhaggueleko herritarrentzat?
Mamadou Adama: Aurrerapena esan nahi du, eta haurrek hezkuntza duina izateko aukera bat da. Herritarrak oso eskertuta daude Oñatiko herriarekin amets hau errealitate bihurtzeagatik.
- BEGIRA: Zer asmo dituzue ikastetxearen etorkizunerako?
Mamadou Adama: Orain hiru gela gehiago eraiki nahi ditugu, eta erabateko eskola bat izan, beharrezko instalazio guztiak dituen eskola bat. Dohaintzen arabera izango da hori, baina aurrera egiten jarraitzeko itxaropena dugu.
- BEGIRA: Zuretzat, zer da proiektu honetako gauzarik garrantzitsuena?
Mamadou Adama: Jendeak parte har dezala. Gustatuko litzaidake jende gehiagok ezagutzea proiektu honek izan duen eragin positiboa, eta jende horrek ekintzarekin bat egitea.
- BEGIRA: Eskerrik asko zure istorioa partekatzeagatik, Mamadou. Arrakasta handia opa dizugu!
Mamadou Adama: Eskerrik asko zuei eta Oñatiko herriari beren eskuzabaltasunagatik. Hau ez litzateke posible izango haiek gabe!