ULMAko emakumeak 60ko hamarkadan — Begira - Ulma aktualitatea

Ulma Taldea

ULMAko emakumeak 60ko hamarkadan

Oñatiar hauek izan ziren 60ko hamarkadan ULMAn lan egin zuten lehenengo hiru emakumeak. Bazkideak ziren, eta egunero joaten ziren Otadui pasealekuko bulegoetara lanera. Ezkontzean, baina, lanera joateari utzi zioten. Elkarrizketa honetan kontatuko digute nolakoa zen emakumeen lana hamarkada hartan.
ULMAko emakumeak  60ko hamarkadan
2020/04/16
Zuek    zarete  ULMAn lanean hasi ziren lehenengo emakumeetako batzuk. Kooperatibaren hasierako urte haietan, zer zeregin eta erantzukizun zenituzten?

P.S.: Ni kontabilitatearen arloan nenbilen. Hasierako emakumeok egiten genituen lanak gizonezkoen lanen oso bestelakoak ziren; ez zeukaten inolako zerikusirik. Garai hartan, bulegoan geunden emakume guztiok; emakume bakar bat ere ez zegoen lantegian. Eta ez zitzaigun burutik pasa ere egiten beste modu batera izan zitekeenik.

A.L.: Fakturazio lanak egiten nituen nik. Garai hartan, JJEIP aldamioak alokatzen hasi zen ULMA, gero erosteko aukerarekin. Oso ideia berritzailea izan zen, eta negozio bolumena nabarmen igo zen. Fakturak egiten pasatzen nuen eguna, eta, gero, bankura eraman behar genituen.

 

J.E.: Nik denetarik egiten nuen pixka bat, baina gehien gogoratzen dudana, eta seguru asko garrantzitsuena: hamabostean behin langileei ordainketa egiteko gutun azalak prestatzen nituen. Lan bitxia zen. Lehenengo, kolektibo osoaren ordutegi fitxak jasotzen nituen. Orduak zenbatu, eta pertsona bakoitzari ordaindu beharrekoa kalkulatzen genuen, eta bankura joaten ginen. Han, diru guztia prestatzen zidaten hurrengo egunerako: eskudirutan eta diru xehe guztia zehaztuta. Hurrengo egunean, dirua jaso, eta pertsona bakoitzari zegokion kopurua gutun azal marroi batzuetan sartzen nuen; eta, ondoren, banatu. Niri oso tratu ona ematen zidaten. Hamabostean behin gutun azalekin joaten nintzen… ez zidaten, bada, harrera ona egingo? Gutun azalak eskuan ikusten nindutenean, izugarri pozten ziren.